विशेष प्रतिनिधी, जुन्नर जुन्नर: जुन्नर आगारातून इंगळून मार्गे भिवाडे येथे जाणाऱ्या एसटी बसेसमध्ये प्रवाशांची प्रचंड गर्दी होत असून, बसच्या अ...
विशेष प्रतिनिधी, जुन्नर
जुन्नर: जुन्नर आगारातून इंगळून मार्गे भिवाडे येथे जाणाऱ्या एसटी बसेसमध्ये प्रवाशांची प्रचंड गर्दी होत असून, बसच्या अधिकृत वाहतूक संख्येच्या (आसन क्षमतेच्या) दुप्पट प्रवासी भरून वाहतूक केली जात असल्याचे चित्र समोर आले आहे. या गंभीर प्रकारामुळे प्रवाशांचा जीव धोक्यात आला असून, एसटी महामंडळाच्या ढिसाळ नियोजनाविरोधात प्रवाशांमधून तीव्र संताप व्यक्त केला जात आहे.
आसन क्षमता ५०, प्रवासी मात्र १०० पार!
जुन्नर आगार ते इंगळून आणि भिवाडे या ग्रामीण भागाला जोडणाऱ्या मार्गावर दिवसातून मोजक्याच फेऱ्या उपलब्ध आहेत. साधारण ५0 ते ५४ आसन क्षमता असलेल्या 'लालपरी'मध्ये प्रत्यक्षात १०० ते ११० प्रवासी प्रवास करत आहेत. बसच्या पायरीवर लटकून आणि चालकाच्या केबिनमध्ये दाटीवाटीने उभे राहून नागरिकांना प्रवास करावा लागत आहे. यामध्ये शालेय विद्यार्थी, महिला आणि वृद्ध प्रवाशांचे प्रचंड हाल होत आहेत.
फेऱ्यांची संख्या कमी असल्याने कोंबाकोंबी
वेळापत्रकानुसार जुन्नरवरून इंगळून मार्गे भिवाडेसाठी सकाळी, दुपारी आणि संध्याकाळी काही ठराविक वेळातच बसेस सुटतात. या संपूर्ण परिसरातील अनेक गावांसाठी हीच एकमेव सार्वजनिक वाहतूक सेवा असल्याने नोकरदार, शेतकरी आणि विद्यार्थ्यांकडे दुसरा कोणताही पर्याय उरत नाही. "पुढची बस कधी येईल याचा नेम नसतो, त्यामुळे नाईलाजाने जीव मुठीत धरून दुप्पट गर्दीत घुसावे लागते," अशी व्यथा एका स्थानिक कॉलेज विद्यार्थ्याने मांडली.
अपघाताची मोठी भीती
ग्रामीण भागातील चढ-उतारांचे आणि वळणांचे रस्ते, त्यातच रस्त्यांची झालेली दुरवस्था यामुळे क्षमतेपेक्षा दुप्पट भार वाहणाऱ्या या बसेसचा कधीही मोठा अपघात होण्याची शक्यता नाकारता येत नाही. एसटी प्रशासनाने या गंभीर समस्येकडे सोयीस्कर दुर्लक्ष केल्याचा आरोप स्थानिक ग्रामस्थांनी केला आहे.
प्रवाशांची प्रमुख मागणी:
* अतिरिक्त बसेसची सोय: जुन्नर-इंगळून-भिवाडे मार्गावर प्रवाशांची वाढती संख्या लक्षात घेता, सकाळी आणि संध्याकाळच्या ऐन गर्दीच्या वेळी जादा बसेस सोडण्यात याव्यात.
* नियमित फेऱ्या: बसेसचे वेळापत्रक नियमित करून फेऱ्यांमधील वेळेचे अंतर कमी केले जावे.
.jpeg)
.jpg)
COMMENTS