जुन्नर तालुक्याच्या पश्चिम भागात रस्त्यांची दयनीय अवस्था; लोकप्रतिनिधी आणि प्रशासकीय अनास्थेमुळे नागरिक त्रस्त

  जुन्नर तालुक्याच्या पश्चिम डोंगराळ भागातील मुख्य आणि अंतर्गत रस्त्यांची अत्यंत दयनीय अवस्था झाली असून, या भागात रस्त्यांवर खड्ड्यांचे साम्...

 

जुन्नर तालुक्याच्या पश्चिम डोंगराळ भागातील मुख्य आणि अंतर्गत रस्त्यांची अत्यंत दयनीय अवस्था झाली असून, या भागात रस्त्यांवर खड्ड्यांचे साम्राज्य निर्माण झाले आहे. या मुख्य मार्गांवरून प्रवास करताना प्रवाशांना दररोज आपला जीव मुठीत धरून प्रवास करावा लागत आहे. अनेक ठिकाणी रस्त्यांची पूर्णपणे चाळण झाली असून, जोडणारे प्रमुख मार्ग उखडल्यामुळे दुचाकी घसरून दररोज लहान-मोठे अपघात घडत आहेत. या खराब रस्त्यांचा सर्वाधिक फटका गरोदर महिला, वृद्ध आणि गंभीर रुग्णांना बसत असून, त्यांना वेळेत रुग्णालयात पोहोचवणेही आता कठीण झाले आहे. तसेच सततच्या खडतर प्रवासामुळे वाहनधारकांना गाड्यांच्या दुरुस्तीचा मोठा आर्थिक भुर्दंड सोसावा लागत आहे.

अशी गंभीर परिस्थिती असतानाही स्थानिक लोकप्रतिनिधी आणि संबंधित शासकीय प्रशासन या समस्येकडे जाणीवपूर्वक दुर्लक्ष करत असल्याचा आरोप स्थानिक नागरिकांकडून केला जात आहे. निवडणुकांपुरती रस्त्यांच्या दुरुस्तीची आश्वासने दिली जातात, मात्र प्रत्यक्षात परिस्थिती जशीच्या तशीच राहत असल्याने जनतेमध्ये तीव्र संताप आहे. मंजूर झालेल्या काही रस्त्यांची कामेही अत्यंत संथ गतीने सुरू असल्यामुळे नागरिकांच्या त्रासात अधिकच भर पडली आहे. पावसाळ्यात या रस्त्यांची अवस्था अधिक बिकट होत असल्याने, प्रशासनाने आतातरी जागे होऊन तातडीने ठोस निधी द्यावा आणि रस्त्यांची कायमस्वरूपी दुरुस्ती करावी अशी मागणी जोर धरत आहे. नियमित कर भरूनही सुरक्षित आणि चांगले रस्ते मिळत नसल्याने, जर प्रशासनाने तातडीने पावले उचलली नाहीत तर पश्चिम भागातील ग्रामस्थांनी तीव्र आंदोलन छेडण्याचा इशारा दिला आहे.