जुन्नरमध्ये खळबळ! आमदार शरद सोनवणेंचे पत्रकारांबाबत आक्षेपार्ह वक्तव्य; पत्रकार संघाकडून जाहीर निषेध

पुणे (क्राईमनामा वृत्तसेवा): जुन्नर विधानसभेचे आमदार शरद सोनवणे हे पुन्हा एकदा आपल्या वादग्रस्त वक्तव्यामुळे चर्चेत आले आहेत. जुन्नर तालुक्य...

पुणे (क्राईमनामा वृत्तसेवा): जुन्नर विधानसभेचे आमदार शरद सोनवणे हे पुन्हा एकदा आपल्या वादग्रस्त वक्तव्यामुळे चर्चेत आले आहेत. जुन्नर तालुक्यातील अजनावळे येथील शासकीय आश्रमशाळेत आयोजित एका बैठकीदरम्यान, आमदार शरद सोनवणे आणि स्थानिक पत्रकार यांच्यात तीव्र शाब्दिक चकमक उडाली. या प्रकरणी महाराष्ट्र राज्य मराठी पत्रकार संघाने आमदार सोनवणे यांचा तीव्र शब्दांत जाहीर निषेध केला आहे.

बैठकीत नेमकं काय घडलं?

मिळालेल्या माहितीनुसार, अजनावळे येथे अदानी प्रकल्पामुळे बाधित झालेल्या शेतकऱ्यांची आणि माळशेज घाट - भोरंडे प्रकल्पाबाबत महत्त्वाची बैठक आयोजित करण्यात आली होती. या बैठकीदरम्यान स्थानिक पत्रकार सुरेश वाणी यांच्याशी चर्चा करताना आमदार शरद सोनवणे यांची जीभ घसरल्याचा आरोप आहे. त्यांनी कथितरीत्या अर्वाच्च भाषेचा वापर करत, "१५ ऑगस्ट होऊ द्या... माझ्यावर याआधी भरपूर गुन्हे आहेत. वाणी, तुमच्याकडे बघून घेतो," अशी धमकी दिल्याचा गंभीर आरोप पत्रकार संघाने केला आहे.

 "पत्रकारांचे धंदे झाले आहेत..." विधानावरून संताप

याच वादादरम्यान आमदारांनी "पत्रकारांचे धंदे झाले आहेत" असे आक्षेपार्ह वक्तव्य करून संपूर्ण पत्रकारितेचा अवमान केल्याचा आरोप करण्यात आला आहे. लोकप्रतिनिधीने जाहीर बैठकीत पत्रकारांना अशा प्रकारे धमकावणे आणि त्यांच्यावर वैयक्तिक टिप्पणी करणे अत्यंत चुकीचे असल्याचे पत्रकार संघाने म्हटले आहे.

राज्यभर आंदोलनाचा इशारा

आमदार शरद सोनवणे यांच्या या कथित विधानानंतर आणि धमकीवजा इशाऱ्यामुळे पुणे जिल्ह्यातील पत्रकार बांधवांमध्ये तीव्र संतापाची लाट पसरली आहे. महाराष्ट्र राज्य मराठी पत्रकार संघाने या घटनेचा जाहीर निषेध केला असून, लोकप्रतिनिधींनी आपल्या पदाची गरिमा राखावी अशी मागणी केली आहे. या प्रकरणी आमदारांनी माफी न मागितल्यास राज्यभर तीव्र आंदोलन छेडण्यात येईल, असा इशाराही पत्रकार संघटनेकडून देण्यात आला आहे.