महिलेच्या गर्भाशयातून सुमारे ५.५ किलो वजनाची गाठ काढली; राजावाडी रुग्णालयात अत्यंत दुर्मिळ शस्त्रक्रिया

 मुंबई : मानखुर्द येथील ४६ वर्षीय महिलेच्या गर्भाशयातून सुमारे ५.५ किलो वजन आणि ३० सेंटीमीटर आकाराची गाठ काढण्यात मुंबई महापालिकेच्या राजावा...

 मुंबई : मानखुर्द येथील ४६ वर्षीय महिलेच्या गर्भाशयातून सुमारे ५.५ किलो वजन आणि ३० सेंटीमीटर आकाराची गाठ काढण्यात मुंबई महापालिकेच्या राजावाडी रुग्णालयातील डॉक्टरांच्या पथकाला यश आले.

ही अत्यंत गुंतागुंतीची शस्त्रक्रिया पार पडली असून महिलेची प्रकृती स्थिर आहे. गाठीच्या चाचणीचा अंतिम अहवाल प्रतीक्षेत आहे.

या महिलेला गेल्या दोन वर्षांपासून पोटाची वाढती सूज, बोथट पोटदुखी आणि श्वास घेण्यास त्रास यासारख्या आरोग्याच्या तक्रारी होत्या. या तक्रारींच्या अनुषंगाने घाटकोपर येथील मुंबई महानगरपालिकेच्या सेठ वाडीलाल छत्रभुज गांधी व मोनजी अमीदास व्होरा महानगरपालिका सर्वसाधारण रूग्णालय (राजावाडी रुग्णालय) येथील स्त्रीरोग विभागाच्या बाह्यरुग्ण विभागात उपचार घेण्यास सुरूवात केली होती.

आरोग्याच्या तक्रारींमध्ये लक्षणीय वाढ होत असल्याने या रूग्णाचा संपूर्ण वैद्यकीय इतिहास, शारीरिक तपासणी आणि आवश्यक तपासण्या करण्यात आल्या. या तपासणीदरम्यान रुग्णामध्ये सुमारे ३० सेमी आकाराची गर्भाशयातील गाठ (ट्युमर) असल्याचे निदान झाले. प्राथमिक निदानानुसार ही गाठ जायंट लिओमायोमा (फायब्रॉईड) असल्याचा संशय होता. शस्त्रक्रियेदरम्यान आणि त्यानंतर उद््भवू शकणाऱ्या अडचणी लक्षात घेऊन सर्व आवश्यक खबरदारी व नियोजन करण्यात आले. त्यानुसार रुग्णावर शस्त्रक्रिया करण्यात आली.

स्त्री रोग विभागामार्फत करण्यात आलेल्या शस्त्रक्रियेसाठी डॉ. स्वाधिना बी. मोहंती, डॉ. शालिनी बगारिया, डॉ. अरवा कांबळे आणि डॉ. काजल साळवी यांनी महत्त्वाची भूमिका बजावली. भूलतज्ज्ञ डॉ. छवी यांच्या मार्गदर्शनाखाली डॉ. श्रेयश आणि डॉ. नेत्रा यांनी भूल विभागाची जबाबदारी सांभाळली. तसेच सर्जिकल स्टाफ नर्स नीलाक्षी गुरव आणि त्यांच्या पथकाने शस्त्रक्रियेसाठी सहकार्य केले.

ट्युमरचा मोठा आकार आणि त्यामधील वाढलेली रक्तवाहिन्यांची जाळी यामुळे शस्त्रक्रिया अत्यंत काळजीपूर्वक पार पाडण्यात आली. शस्त्रक्रियेनंतर काढलेला ५.५ किलो ट्युमर हिस्टोपॅथॉलॉजिकल तपासणीसाठी पाठविण्यात आला आहे. या चाचणीचा अंतिम अहवाल प्रतीक्षेत आहे. शस्त्रक्रियेनंतर रुग्णावर विशेष काळजीपूर्वक उपचार करण्यात आले. शस्त्रक्रियेनंतर पाचव्या दिवशी प्रकृतीत सुधारणा झाल्यानंतर रूग्णाला रुग्णालयातून घरी पाठविण्यात आले. मोठ्या आकाराच्या गर्भाशयातील गाठीची प्रकरणे अत्यंत दुर्मिळ असल्याचे डॉक्टरांचे म्हणणे आहे.