ऑस्ट्रेलियन टी-२० बिग बॅश लीगचे भारतात प्रथमच ऐतिहासिक पदार्पण; चेन्नईत रंगणार पहिला सामना

  ऑस्ट्रेलियाची प्रतिष्ठित टी-२० क्रिकेट स्पर्धा बिग बॅश लीग (बीबीएल) प्रथमच भारतात पदार्पण करणार आहे. पंतप्रधान नरेंद्र मोदी आणि ऑस्ट्रेलिय...

 

ऑस्ट्रेलियाची प्रतिष्ठित टी-२० क्रिकेट स्पर्धा बिग बॅश लीग (बीबीएल) प्रथमच भारतात पदार्पण करणार आहे. पंतप्रधान नरेंद्र मोदी आणि ऑस्ट्रेलियाचे पंतप्रधान अँथनी अल्बनीज यांनी शुक्रवारी या ऐतिहासिक उपक्रमाची घोषणा केली.याअंतर्गत बिग बॅश लीगच्या १६व्या हंगामातील उद्घाटन सामना १२ डिसेंबर रोजी चेन्नईच्या एम. ए. चिदंबरम स्टेडियममध्ये खेळवला जाणार आहे. या सामन्यात मेलबर्न रेनेगेड्स आणि विद्यमान विजेता पर्थ स्कॉर्चर्स हे संघ आमनेसामने येतील.

हा सामना अनेक अर्थांनी ऐतिहासिक ठरणार आहे. भारतात सामना खेळणारी बिग बॅश लीग ही पहिली परदेशी क्रिकेट लीग ठरेल. डिसेंबरमध्ये भारतात आयोजित करण्यात येणाऱ्या आठवडाभर चालणाऱ्या ऑस्ट्रेलियन सांस्कृतिक महोत्सवाचे हे प्रमुख आकर्षण असेल. क्रिकेट ऑस्ट्रेलियाच्या मते, जगातील सर्वात मोठ्या क्रिकेट बाजारपेठ असलेल्या भारतात सामना आयोजित केल्यामुळे लीगची लोकप्रियता आणि प्रेक्षकसंख्या लक्षणीय वाढेल.क्रिकेट ऑस्ट्रेलियाने पुष्टी केली आहे की हा सामना १२ डिसेंबर रोजी चेन्नईतील ३८ हजार प्रेक्षक क्षमतेच्या एम. ए. चिदंबरम स्टेडियममध्ये खेळवला जाईल. मेलबर्न रेनेगेड्स या सामन्यात यजमान संघ असेल. स्थानिक वेळेनुसार सामना दुपारी २:४० वाजता सुरू होईल (भारतीय वेळेनुसार सकाळी अंदाजे १०:३० वाजता). भारतात या सामन्याचे थेट प्रक्षेपण जिओस्टारवर केले जाईल, तर ऑस्ट्रेलियामध्ये चॅनल सेव्हन, ७प्लस, कायो स्पोर्ट्स आणि फॉक्स क्रिकेटवर थेट प्रसारण होईल.

क्रिकेट ऑस्ट्रेलियाच्या माहितीनुसार, भारतीय क्रिकेट नियामक मंडळ (बीसीसीआय) आणि ऑस्ट्रेलियाच्या महावाणिज्य दूतावासाच्या सहमतीने चेन्नईची निवड करण्यात आली. शहरातील क्रिकेटविषयीचे प्रचंड आकर्षण आणि इंडियन प्रीमियर लीग (आयपीएल) फ्रँचायझी चेन्नई सुपर किंग्जचा मोठा चाहता वर्ग लक्षात घेऊन या ऐतिहासिक सामन्यासाठी चेन्नई हे सर्वात योग्य ठिकाण मानण्यात आले.क्रिकेट ऑस्ट्रेलियाला अपेक्षा आहे की या उपक्रमामुळे बिग बॅश लीगला भारतात नवी ओळख मिळेल आणि भविष्यात भारत-ऑस्ट्रेलिया क्रीडा सहकार्य आणखी मजबूत होईल.