'मी भवानीला मारुन टाकलं', एक कॉल आला अन् बॉयफ्रेंडही बेशुद्ध अवस्थेत तिथेच सापडला

  Crime News : एका 22 वर्षीय तरुणीचा संशयास्पद मृत्यू झाल्याची घटना समोर आली असून, या प्रकरणाने संपूर्ण परिसरात खळबळ उडाली आहे. एस. भवानी अस...

 

Crime News : एका 22 वर्षीय तरुणीचा संशयास्पद मृत्यू झाल्याची घटना समोर आली असून, या प्रकरणाने संपूर्ण परिसरात खळबळ उडाली आहे. एस. भवानी असे मृत तरुणीचे नाव असून, ती एका मोबाईल शोरूममध्ये बिलिंग असिस्टंट म्हणून काम करत होती आणि सोबतच आपले शिक्षणही पूर्ण करत होती.शुक्रवारी सकाळी पोलीस जेव्हा तिच्या भाड्याच्या घराचा दरवाजा तोडून आत शिरले, तेव्हा भवानी रक्ताच्या थारोळ्यात मृतावस्थेत आढळली, तर तिचा प्रियकर चंद्रशेखर ऊर्फ चंदू हा तिच्या शेजारीच बेशुद्ध अवस्थेत सापडला. या घटनेमुळे भवानीच्या कुटुंबावर दुःखाचा डोंगर कोसळला आहे.

"तुझ्या मुलीची हत्या केली, तुला जे करायचंय ते कर,"

भवानीचे वडील श्रीनिवास यांनी दिलेल्या तक्रारीनुसार, त्यांना भवानी आणि चंद्रशेखर यांच्यातील संबंधांची माहिती नुकतीच मिळाली होती. हे संबंध मान्य नसल्यामुळे त्यांनी भवानीचे लग्न दुसऱ्या मुलाशी ठरवण्याचा निर्णय घेतला होता. शुक्रवारी सकाळी एका नातेवाईकाने भवानी आणि चंद्रशेखरचा एकत्र फोटो व्हॉट्सॲपवर पाहिल्यानंतर त्यांना काळजी वाटू लागली. श्रीनिवास यांनी भवानीला फोन करण्याचा प्रयत्न केला, पण तिचा फोन बंद होता. त्यानंतर त्यांनी चंद्रशेखरला संपर्क साधला, तेव्हा त्याने अत्यंत निर्दयीपणे फोन उचलून, "मी तुझ्या मुलीची हत्या केली आहे, तुला जे करायचे आहे ते कर," अशी धक्कादायक कबुली दिली आणि त्यानंतर त्याने पोलीस स्वतःच आपल्याला पकडतील असेही सांगितले.

बॉयफ्रेंडही बेशुद्ध अवस्थेत तिथेच सापडला

पोलिसांनी दिलेल्या माहितीनुसार, मुलीच्या वडिलांकडून माहिती मिळताच कुटुंबीयांनी घरमालकाला सतर्क केले. घरमालकाने दरवाजा आतून बंद असल्याचे सांगितल्यानंतर पोलिसांनी घटनास्थळी धाव घेतली. सकाळी साडेनऊच्या सुमारास पोलिसांनी दरवाजा तोडून आत प्रवेश केला असता, भवानीचा मृतदेह रक्ताच्या थारोळ्यात होता. भवानीला तातडीने रुग्णालयात नेण्यात आले, परंतु डॉक्टरांनी तिला मृत घोषित केले. सुरुवातीच्या तपासात धारदार शस्त्राने भवानीची हत्या करण्यात आल्याचे स्पष्ट झाले आहे. चंद्रशेखर बेशुद्ध अवस्थेत सापडल्याने तो नक्की कशामुळे बेशुद्ध झाला, याचीही पोलीस आता चौकशी करत आहेत.

ब्यादराहल्ली पोलीस ठाण्यात याप्रकरणी भारतीय न्याय संहितेच्या संबंधित कलमांनुसार हत्येचा गुन्हा दाखल करण्यात आला आहे. भवानीचा मृतदेह शवविच्छेदनासाठी पाठवण्यात आला असून, पोलीस या प्रकरणाचा अधिक सखोल तपास करत आहेत. चंद्रशेखरचे बेशुद्ध असणे हे आत्महत्येचा प्रयत्न होता की त्यामागे काही वेगळे कारण आहे, हे वैद्यकीय अहवाल आल्यानंतरच स्पष्ट होणार आहे. या भीषण घटनेने भवानीच्या कुटुंबासह परिसरात भीतीचे वातावरण निर्माण झाले असून, तरुणीच्या हत्येच्या या प्रकरणाचा तपास पोलीस यंत्रणा वेगाने करत आहेत. बेंगळुरूच्या ब्यादराहल्ली परिसरात ही घटना घडली.