रेशन कार्डमध्ये कुटुंबातील सदस्यांची नावे वाढवायची का? ऑनलाईन प्रोसेस अगदी सोपी

  रेशन कार्ड हे केवळ स्वस्त धान्य मिळवण्याचे साधन नसून एक महत्त्वाचे ओळखपत्र आहे. नवीन सदस्याचे नाव जोडण्यासाठी आधार कार्ड, जन्म दाखला किंवा...

 

रेशन कार्ड हे केवळ स्वस्त धान्य मिळवण्याचे साधन नसून एक महत्त्वाचे ओळखपत्र आहे. नवीन सदस्याचे नाव जोडण्यासाठी आधार कार्ड, जन्म दाखला किंवा विवाह नोंदणी प्रमाणपत्र या कागदपत्रांच्या मदतीने 'महाफूड' (Mahafood) पोर्टलवरून डिजिटल अर्ज करता येतो.अवघ्या काही मिनिटांत पूर्ण होणाऱ्या या ऑनलाईन प्रक्रियेची सविस्तर माहिती.

आता तुम्ही घरबसल्या कोणत्याही त्रासाशिवाय कुटुंबातील नवीन सदस्यांचे नाव रेशन कार्डमध्ये जोडू शकता. ही ऑनलाईन प्रक्रिया कशी आहे आणि यासाठी कोणती कागदपत्रे लागतात, याची सविस्तर तांत्रिक माहिती खालीलप्रमाणे आहे.

आवश्यक कागदपत्रे

1.लहान मुलाचे नाव जोडण्यासाठी:

कुटुंबाच्या मुख्य प्रमुखाचे मूळ रेशन कार्ड.

मुलाचे जन्म प्रमाणपत्र

मुलाचे आधार कार्ड.

पालकांचे आधार कार्ड

2. लग्नानंतर पत्नीचे/सुनेचे नाव जोडण्यासाठी:

पतीचे मूळ रेशन कार्ड.

पत्नीचे आधार कार्ड.

विवाह नोंदणी प्रमाणपत्र

पत्नीच्या माहेरच्या रेशन कार्डमधून नाव कमी केल्याचा दाखला

ऑनलाईन नाव नोंदणीची स्टेप-बाय-स्टेप प्रोसेस

पोर्टलला भेट द्या: सर्वात आधी तुमच्या राज्याच्या अन्न व नागरी पुरवठा विभागाच्या अधिकृत संकेतस्थळाला (उदा. महाराष्ट्रासाठी rcms.maharashtra.gov.in किंवा mahafood.gov.in) भेट द्या.

लॉगिन करा: होम पेजवर 'रेशन कार्ड' सेक्शनमध्ये जाऊन 'E-Ration Card Link' किंवा 'Customer Login' वर क्लिक करा. तुमच्याकडे आयडी नसेल, तर मोबाईल नंबर आणि आधार कार्डचा वापर करून नवीन रजिस्ट्रेशन (Sign Up) करा.

सेवा निवडा: लॉगिन झाल्यानंतर डॅशबोर्डवरील विविध पर्यायांपैकी 'Add New Member' या लिंकवर क्लिक करा.

माहिती भरा: आता स्क्रीनवर एक नवीन अर्ज उघडेल. यामध्ये ज्या नवीन सदस्याचे नाव जोडायचे आहे, त्यांचे नाव (इंग्रजी आणि मराठीत), जन्मतारीख, लिंग आणि कुटुंबाच्या प्रमुखाशी असलेले नाते अचूक भरा.

कागदपत्रे अपलोड करा: माहिती भरून झाल्यावर, त्या सदस्याचे ओळखपत्र (आधार कार्ड किंवा जन्म दाखला) जोडा. विचारलेली सर्व कागदपत्रे स्पष्ट फॉरमॅटमध्ये (JPEG किंवा PDF) अपलोड करा.

अर्ज सबमिट करा: सर्व माहिती पुन्हा एकदा व्यवस्थित तपासून घ्या. त्यानंतर 'Submit' बटनवर क्लिक करा. अर्जाची प्रक्रिया पूर्ण झाल्यावर स्क्रीनवर एक 'Application Reference Number' मिळेल. तो जपून ठेवा.

पडताळणी आणि नवीन रेशन कार्ड

अर्ज सबमिट केल्यानंतर, अन्न पुरवठा विभागाचे प्राधिकृत अधिकारी तुमच्या कागदपत्रांची डिजिटल आणि प्रत्यक्ष पडताळणी करतात. सर्व माहिती बरोबर आढळल्यास, साधारणपणे 2 ते 3 आठवड्यांत नवीन सदस्याचे नाव तुमच्या रेशन कार्डमध्ये समाविष्ट केले जाते. त्यानंतर तुम्ही नवीन डिजिटल रेशन कार्ड ऑनलाईन डाऊनलोड करू शकता.