विक्रमी भावानंतर काळ्या हळदीत नरमाई; पुढे तेजी येणार की मंदी?

  वाशिम कृषी उत्पन्न बाजार समितीत सोमवारी झालेल्या लिलावात काळ्या हळदीला (कोच्या) कमाल २२ हजार रुपये प्रति क्विंटल दर मिळाला. किमान दर १६ हज...

 

वाशिम कृषी उत्पन्न बाजार समितीत सोमवारी झालेल्या लिलावात काळ्या हळदीला (कोच्या) कमाल २२ हजार रुपये प्रति क्विंटल दर मिळाला. किमान दर १६ हजार ८५० रुपये प्रति क्विंटल नोंदविण्यात आला.दर चांगले असले तरी यापूर्वी मिळालेल्या विक्रमी दरांच्या तुलनेत भावात घसरण झाल्याने हळद उत्पादक शेतकऱ्यांमध्ये नाराजीचे वातावरण आहे.(Kali Haldi Bhav)

बाजार समितीत सोमवारी केवळ काळ्या हळदीची सुमारे ७०० क्विंटल आवक झाली, तर एकूण हळदीची आवक ७ हजार ५०० क्विंटलच्या पुढे गेली. मोठ्या प्रमाणावर मालाची आवक होत असतानाच दरात चढ-उतार सुरू असल्याने शेतकरी बाजाराच्या हालचालींवर बारकाईने लक्ष ठेवून आहेत.(Kali Haldi Bhav)

विक्रमी दरानंतर घसरण

काळ्या हळदीच्या दरांनी यंदा अनेकदा विक्रमी पातळी गाठली होती. विशेषतः २५ मे रोजी वाशिम बाजार समितीत काळ्या हळदीला तब्बल २५ हजार रुपये प्रति क्विंटलचा कमाल दर मिळाला होता. त्यानंतर बाजारात दरात काहीशी घसरण सुरू झाली.

काळ्या हळदीच्या भावाचा आलेख पाहता २६ एप्रिल रोजी २३ हजार ५०० रुपये, ११ मे रोजी २२ हजार ३०० रुपये, १२ मे रोजी २१ हजार रुपये, २५ मे रोजी २५ हजार रुपये आणि आता २२ जून रोजी २२ हजार रुपये प्रति क्विंटल असा कमाल दर नोंदविण्यात आला आहे.

दरातील या चढ-उतारामुळे अनेक शेतकऱ्यांनी आणखी भाववाढीच्या अपेक्षेने माल रोखून ठेवला होता. मात्र सध्याच्या घसरणीमुळे त्यांच्या अपेक्षांवर काहीसे पाणी फिरल्याचे चित्र आहे.

उत्पादन क्षेत्र घटण्याची शक्यता

जिल्ह्यात यंदा अनेक शेतकऱ्यांनी मे महिन्यापासूनच हळदीची लागवड सुरू केली होती. मात्र नंतर सिंचनासाठी पुरेसे पाणी उपलब्ध न झाल्याने अनेक ठिकाणी हळदीचे पीक कुजल्याच्या घटना समोर आल्या आहेत.

पावसाच्या अनियमिततेमुळे आणि पाण्याच्या टंचाईमुळे यंदा हळदीखालील क्षेत्र घटण्याची शक्यता कृषी क्षेत्रातील जाणकार व्यक्त करत आहेत. त्यामुळे आगामी हंगामात उत्पादनात घट झाल्यास दरांना पुन्हा आधार मिळू शकतो, अशी अपेक्षा शेतकरी व्यक्त करत आहेत.

कांडी हळदीच्या दरातही मवाळपणा

काळ्या हळदीसोबतच कांडी हळदीच्या दरातही किंचित घसरण दिसून आली आहे. वाशिम बाजार समितीत सोमवारी कांडी हळदीला कमाल १४ हजार ६६५ रुपये प्रति क्विंटल दर मिळाला.

याआधी कारंजा कृषी उत्पन्न बाजार समितीत कांडी हळदीला १३ हजार ५५० रुपये प्रति क्विंटलपर्यंत कमाल भाव मिळाला होता. मागील काही आठवड्यांच्या तुलनेत कांडी हळदीच्या बाजारातही मवाळपणा दिसून येत आहे.

शेतकऱ्यांचे लक्ष आगामी बाजारावर

हळदीचे दर अजूनही समाधानकारक पातळीवर असले तरी विक्रमी दरांच्या तुलनेत झालेली घसरण शेतकऱ्यांसाठी चिंतेची बाब ठरत आहे. दुसरीकडे उत्पादन क्षेत्र घटण्याची शक्यता आणि आगामी काळातील मागणी यामुळे हळदीच्या बाजारभावात पुन्हा तेजी येण्याची शक्यता वर्तविली जात आहे.

यामुळे हळद उत्पादक शेतकऱ्यांचे लक्ष आता आगामी आठवड्यांतील बाजारातील घडामोडी आणि दरांच्या चढ-उतारांकडे लागले आहे.