चेंजिंग रुममध्ये छिद्र दिसलं...,अन् सेल्समनचा मोबाईलमध्ये भयंकर दृश्य!

 Crime News : एका रेडीमेड कपड्यांच्या दुकानात महिलांच्या प्रायव्हसीचा भंग करणारी अतिशय संतापजनक घटना समोर आली आहे. मुख्य बाजारपेठेतील 'ज...

 Crime News : एका रेडीमेड कपड्यांच्या दुकानात महिलांच्या प्रायव्हसीचा भंग करणारी अतिशय संतापजनक घटना समोर आली आहे. मुख्य बाजारपेठेतील 'जमजम कलेक्शन' नावाच्या दुकानात शनिवारी सायंकाळी एक महिला आपल्या पती आणि मुलांसोबत कपडे खरेदीसाठी गेली होती.कपडे बदलण्यासाठी ती दुकानातील चेंजिंग रूममध्ये गेली असता, तेथील सेल्समन शाहरुख मणियार याने चेंजिंग रूमच्या छताला असलेल्या छिद्रातून तिचा चोरून व्हिडिओ बनवला. या कृत्याचा महिलेला संशय आल्यावर तिने तातडीने आपल्या पतीला याची कल्पना दिली. पतीने तपासणी केली असता, शाहरुखच्या आयफोनमध्ये हा व्हिडिओ रेकॉर्ड झालेला आढळून आला.

नागरिकांकडून कडक कारवाईची मागणी

यानंतर पीडित कुटुंबाने तात्काळ पोलिसांना पाचारण केले. पोलिसांच्या तपासणीत शाहरुखच्या फोनमध्ये केवळ त्या महिलेचेच नाही, तर गेल्या तीन दिवसांत बनवलेले 10 आक्षेपार्ह फोटो आणि 3 व्हिडिओ सापडले आहेत. ही घटना समोर आल्यानंतर दुकानाचे मालक आणि कर्मचाऱ्यांनी प्रकरण दाबून टाकण्याचा आणि पीडित कुटुंबाला पैशांचे आमिष दाखवून तडजोड करण्याचा प्रयत्न केला. मात्र, या धक्कादायक प्रकाराची माहिती बाजारपेठेत पसरताच स्थानिक नागरिकांमध्ये तीव्र संतापाची लाट उसळली. संतप्त जमावाने दुकानाबाहेर मोठी गर्दी करत कडक कारवाईची मागणी केली आणि मुख्य बाजारपेठेत काही काळ धरणे आंदोलनही केले.

परिस्थिती चिघळण्याची शक्यता पाहता, चिडावा पोलिसांसह पिलानी, सुलताना, सुरजगड आणि मंड्रेला या परिसरातील पोलीस ठाण्यांमधून जादा पोलीस कुमक मागवण्यात आली. वाढता रोष पाहता पोलिसांनी दुकानाबाहेर कडक बंदोबस्त लावला आणि गर्दीला शांत केले. आरोपी सेल्समनला पोलिसांनी ताब्यात घेऊन त्याचा मोबाइल जप्त केला आहे. या प्रकरणाची गंभीरता लक्षात घेता, आता आरोपीच्या मोबाइलची तांत्रिक तपासणी केली जाणार आहे, जेणेकरून हे व्हिडिओ कोणाला पाठवले गेले आहेत किंवा सोशल मीडियावर अपलोड केले आहेत का, याचा तपास केला जाणार आहे.

पोलिसांनी दुकान केले सील

या घटनेमुळे संपूर्ण चिडावा परिसरात महिलांच्या सुरक्षिततेचा प्रश्न पुन्हा एकदा गंभीरपणे उपस्थित झाला आहे. स्थानिक सामाजिक संघटनांनी या कृत्याचा तीव्र निषेध केला असून, आरोपी आणि त्याला मदत करणाऱ्या दुकानातील इतरांवरही कठोर कारवाई करण्याची मागणी केली आहे. पोलिसांनी दुकान सील केले असून, पुढील कायदेशीर कारवाई वेगाने सुरू केली आहे. या अमानुष कृत्यामुळे नागरिकांमध्ये भीतीचे वातावरण असून, अशा प्रकारच्या घटनांवर आळा घालण्यासाठी प्रशासनाने कडक धोरण अवलंबण्याची गरज असल्याचे मत नागरिकांनी व्यक्त केले आहे. सध्या या प्रकरणाचा तपास पोलीस अधिकारी करत असून, आरोपीच्या कृत्यामागील अधिक माहिती लवकरच स्पष्ट होईल. ही घटना राजस्थानमधील झुंझुनू जिल्ह्यातील चिडावा शहरात घडली.