मैत्रिणीच्या भावाला 40 फोटो आणि 3 व्हिडिओ पाठवले, दोन कुटुंब धावत पोहोचली, गाडीमध्ये युगुलाचा गूढ अंत

  भोपाळ : मध्य प्रदेशातील अशोक नगर येथील रहिवासी वर्धमान जैन यांनी २४ जून रोजी रात्री ९:४२ वाजता आपल्या मोबाईलचे इंटरनेट सुरु करताच व्हॉट्सॲ...

 

भोपाळ : मध्य प्रदेशातील अशोक नगर येथील रहिवासी वर्धमान जैन यांनी २४ जून रोजी रात्री ९:४२ वाजता आपल्या मोबाईलचे इंटरनेट सुरु करताच व्हॉट्सॲपवर ४० हून अधिक फोटो आणि तीन व्हिडिओ डाऊनलोड झाले.त्यांत त्यांची चुलत बहीण मुस्कान जैन एका तरुणासोबत दिसत होती. धक्कादायक बाब म्हणजे, हे मेसेज पाठवणारी व्यक्ती म्हणजे फोटोंमध्ये दिसणारा तरुण रितिक सोनी होता.

कारमध्ये जोडप्याच्या बॉडी

मुस्कान बेपत्ता होती. तिच्याशी संपर्क होऊ शकत नसल्यामुळे या मेसेजने घबराट निर्माण झाली. अनेक तास शोध घेतल्यानंतर पोलिसांनी तिच्या फोनचे लोकेशन इसागड रोडवरील महाना गावाजवळ असल्याचे शोधून काढले, तिथे त्यांना एक कार उभी असलेली आढळली. त्यामध्ये मुस्कान आणि रितिक यांचे शव होते. घटनास्थळावरुन पिस्तूल, कुऱ्हाड, पेपर कटर, सल्फासच्या गोळ्या आणि दोन पानांची मृत्यूपूर्वी लिहिलेली चिठ्ठी जप्त करण्यात आली. प्राथमिक तपासावरून असे दिसून येते की, रितिकने स्वतःवर गोळी झाडून घेण्यापूर्वी कुऱ्हाड आणि पेपर कटरच्या साहाय्याने मुस्कानची हत्या केली होती.

गाडीत चप्पल, सल्फास, चॉकलेट्स

ती कार रस्त्याच्या कडेला असलेल्या एका शेतात रस्त्यापासून सुमारे ८ फूट खाली आढळली. तिचा पुढचा भाग अपघातग्रस्त झालेला होता. चालकाच्या बाजूच्या दरवाजाच्या खालच्या भागावर रक्ताचे डाग दिसत होते, तर मागील खिडकीच्या काचेचा वरचा भाग काळा पडला होता. त्यावरुन तिथे आग लागल्याचा अंदाज येत होता. पोलिसांनी घटनास्थळी सापडलेली एक चप्पल, कुऱ्हाड, पेपर कटर, सल्फासच्या गोळ्या आणि चॉकलेट्स जप्त केले.

ग्रामीण पोलीस ठाण्याचे प्रभारी भुवनेश शर्मा यांनी सांगितले की, पोलिसांनी रितिक आणि मुस्कान यांच्या मोबाईलचे लोकेशन इसागड रोडवर असल्याचे शोधून काढले आणि त्यांच्या कुटुंबीयांसह पहाटे ३ वाजेपर्यंत त्यांचा शोध घेतला. लोकेशन सतत बदलत असल्याने टीमने मागोवा घेतला आणि रस्त्याखालील शेतात उभी असलेली i-20 कार शोधून काढली.

स्टिअरिंगवर रितीकचं डोकं

प्रत्यक्षदर्शींनी सांगितले की, कारचा हॉर्न सतत वाजत होता. पोलिसांनी चालकाच्या बाजूचा दरवाजा उघडताच, रितिकच्या हातातील पिस्तूल खाली पडले. रितिकची बॉडी चालकाच्या सीटवर आढळली; त्याचे डोके स्टिअरिंग व्हीलवर टेकलेले असल्याने हॉर्न वाजत राहिलेला, तर शेजारच्या सीटवर मुस्कानचं शव पालथं पडलेलं होतं.

मुस्कान नेहमीप्रमाणे रात्री ९ वाजता जिमवरुन येईल, अशी कुटुंबाला अपेक्षा होती. वेळ उलटून गेल्यावर सगळ्या नातेवाईकांकडे चौकशी केली, मात्र ती कुठेच सापडली नाही. रितीकच्या कुटुंबीयांनी सांगितले की, तो १५ दिवसांपूर्वी घरी आला होता. तो इंदूरहून सुमारे १५ दिवसांपूर्वीच अशोक नगरला परतला होता. घटनेच्या दिवशी तो दुपारी ४ च्या सुमारास घरातून बाहेर पडला, रात्री ८ वाजता थोड्या वेळासाठी परत आला आणि त्यानंतर पुन्हा बाहेर गेला.

रितीकच्या कुटुंबाचं दुर्लक्ष

रात्री साधारण १० वाजता त्याच्या भावाला एक फोन आला की, रितिकच्या सोशल मीडिया अकाउंटवरून एका तरुणीसोबतचे त्याचे खाजगी फोटो आणि व्हिडिओ पोस्ट करण्यात आले आहेत. ते अकाउंट हॅक झाले असावे असे समजून, सुरुवातीला कुटुंबाने याकडे फारसे गांभीर्याने पाहिले नाही. जेव्हा रितिक घरी परतला नाही, तेव्हा त्याचे वडील आणि कुटुंबातील इतर सदस्यांनी त्याचा शोध घेण्यास सुरुवात केली.

दोघांची मैत्री जुळली

कुटुंबाने दिलेल्या माहितीनुसार, रितिक आणि मुस्कान यांची इंदूरमध्ये भेट झाली होती. त्यांनी एकाच कंपनीत जवळपास दोन वर्षे काम केले; या काळात त्यांची मैत्री झाली. त्यांनी शहराच्या आसपासच्या अनेक ठिकाणांना एकत्र भेटी दिल्या होत्या. तपासादरम्यान समोर आलेले त्यांचे खाजगी फोटो व व्हिडिओ त्यांच्या मैत्रीच्या त्याच काळातील असावेत, असे मानले जाते.

प्राथमिक तपासावरून असे दिसून येते की रितिक सोनीने आधी मुस्कानची हत्या केली आणि मग स्वतःचे आयुष्य संपवले. त्याने मुस्कानच्या डोक्याच्या मागच्या भागावर कुऱ्हाडीने वार केला आणि नंतर पेपर कटरने तिचा गळा कापला. मागची सीट अंशतः जळालेली होती, ज्यावरून गाडीला आग लावण्याचा प्रयत्न झाल्याचे दिसून येते.

कुटुंबीयांच्या माहितीनुसार, मुस्कानने इंजिनिअरिंगचे शिक्षण घेतले होते आणि ती इंटिरिअर डिझायनिंगच्या क्षेत्रात काम करत होती. काही काळापूर्वी ती इंदूरहून अशोकनगरला परतली होती. दुसरीकडे, रितीक इंदूरमध्ये राहत होता; तिथे त्याने दागिन्यांशी संबंधित स्वतःचा व्यवसाय सुरु केला होता.