बोगस PSI बनून महिला कॉन्स्टेबलला ओढले जाळ्यात, अन.....

बिहारच्या दरभंगा जिल्ह्यातून फसवणूक आणि ब्लॅकमेलिंगची एक धक्कादायक घटना समोर आली आहे. येथे एका व्यक्तीने बोगस फौजदार बनून एका महिला पोलिसाला...

बिहारच्या दरभंगा जिल्ह्यातून फसवणूक आणि ब्लॅकमेलिंगची एक धक्कादायक घटना समोर आली आहे. येथे एका व्यक्तीने बोगस फौजदार बनून एका महिला पोलिसाला प्रेमाच्या जाळ्यात ओढून तिच्याशी लग्नही केले.

बेनीपूर येथील न्यायालयात तैनात असलेल्या पीडित महिला पोलिसाची भेट भागलपुर येथील राहुल कुमार सिंह याच्याशी झाली होती. राहुल नेहमी उपनिरीक्षकाच्या (SI) गणवेशात वावरत असे आणि त्याने आपण कटिहार जिल्ह्यात कार्यरत असल्याचे खोटे सांगितले होते. त्याने बनावट ओळखपत्र दाखवून तिचा विश्वास संपादन केला आणि अखेर 12 मार्च 2026 रोजी या दोघांचा विवाह झाला.

फोटोंच्या आधारे ब्लॅकमेल

लग्नानंतर काही दिवसांतच राहुलचा खरा चेहरा समोर आला. त्याने कपटाने महिला पोलिसाचे काही वैयक्तिक आणि आक्षेपार्ह फोटो आपल्या मोबाईलमध्ये कैद केले. या फोटोंच्या आधारे त्याने पीडितेला ब्लॅकमेल करण्यास सुरुवात केली. ते फोटो सोशल मीडियावर व्हायरल करण्याची धमकी देऊन तो तिचा मानसिक आणि शारीरिक छळ करू लागला. जेव्हा तिने या कृत्याला विरोध केला, तेव्हा आरोपीने तिला मारहाण केली आणि जातीवाचक शिवीगाळ करत तिचा अपमान केला. आरोपीचा उद्दामपणा इतका वाढला की, त्याने महिला पोलिसाच्या बॅरेकमध्ये शिरून गोंधळ घातला आणि तिला बेदम मारहाण केली.

महिला पोलिसाने अखेर..

या सततच्या छळाला कंटाळून पीडित महिला पोलिसाने धैर्याने पाऊल उचलले आणि 'डायल 112' वर पोलिसांना माहिती दिली. घटनेचे गांभीर्य ओळखून पोलिसांनी तातडीने घटनास्थळी धाव घेतली आणि बनावट फौजदार बनलेल्या राहुल कुमार सिंह याला अटक केली. बहेडा पोलीस ठाण्याचे प्रमुख पंकज कुमार यांनी सांगितले की, आरोपीला ताब्यात घेण्यात आले असून पीडितेच्या जबाबानुसार त्याच्यावर एफआयआर (FIR) दाखल करण्यात आला आहे. पोलीस सध्या त्याच्याकडे असलेले बनावट दस्तऐवज आणि मोबाईलची कसून चौकशी करत आहेत.

पोलिसालाच फसवणुकीला सामोरे जावे लागले

एका पोलीस कर्मचाऱ्याचीच वर्दीच्या नावाने अशा प्रकारे फसवणूक झाल्यामुळे संपूर्ण जिल्ह्यात या प्रकरणाची जोरदार चर्चा होत आहे. स्वतः कायद्याचे रक्षक असलेल्या विभागात कार्यरत असूनही, या महिलेला इतक्या मोठ्या फसवणुकीला सामोरे जावे लागल्याने आश्चर्य व्यक्त केले जात आहे. पोलीस या प्रकरणाचा पुढील तपास करत असून आरोपीने अशाच प्रकारे इतर कुणाची फसवणूक केली आहे का, याचाही शोध घेतला जात आहे.