नाशिकमध्ये व्हॉट्सॲपच्या माध्यमातून तब्बल १ कोटी ७७ लाख रुपयांना गंडा.

  नाशिक: ऑनलाइन शेअर बाजारात मोठ्या नफ्याचे आमिष दाखवत व्हॉट्सॲपद्वारे उभारलेल्या बनावट ट्रेडिंग ग्रुपच्या माध्यमातून सायबर टोळीने तिघांना त...

 

नाशिक: ऑनलाइन शेअर बाजारात मोठ्या नफ्याचे आमिष दाखवत व्हॉट्सॲपद्वारे उभारलेल्या बनावट ट्रेडिंग ग्रुपच्या माध्यमातून सायबर टोळीने तिघांना तब्बल १ कोटी ७७ लाख रुपयांना गंडा घातला आहे.

या प्रकरणी सायबर पोलिस ठाण्यात गुन्हा दाखल करण्यात आला असून, आरोपींचा शोध सुरू आहे.

नाशिक शहरातील एका व्यावसायिकाने याबाबत तक्रार दाखल केली आहे. ऑगस्ट महिन्यात त्यांच्या व्हॉट्सॲपवर एका शेअर मार्केट ग्रुपमध्ये समाविष्ट केल्याचा मेसेज आला. या ग्रुपमध्ये स्वतःला नामांकित 'नुवामा' कंपनीचे शेअर ब्रोकर्स असल्याचे सांगणाऱ्या अनन्या शर्मा, वंशिका गिल आणि नविशा सनयम या नावांच्या व्यक्तींनी वेगवेगळ्या मोबाईल क्रमांकांवरून संपर्क साधला. सुरुवातीला विश्वास संपादन करण्यासाठी ऑनलाइन शेअर ट्रेडिंगचे प्रशिक्षण देण्यात आले. या तथाकथित ब्रोकर्सनी शेअर मार्केटमधील लिस्टेड कंपन्यांमध्ये गुंतवणूक केल्यास मोठा नफा मिळेल, असे सांगत विविध बँक खात्यांत ऑनलाइन रक्कम भरण्यास सांगितले. सुरुवातीला काही बनावट नफ्याचे आकडे आणि स्क्रीनशॉट पाठवून विश्वास वाढवण्यात आला. त्यानंतर गुंतवणुकीची रक्कम वाढवण्यास भाग पाडत तिघांकडून मोठ्या प्रमाणात पैसे उकळण्यात आले.

या फसवणुकीत सर्वाधिक नुकसान एका साडी विक्रेत्या व्यावसायिकाचे झाले असून त्यांनी १ कोटी १० लाख रुपयांची गुंतवणूक केली. याशिवाय खासगी कंपनीत नोकरी करणाऱ्या एका व्यक्तीची ५८ लाख रुपयांची, तर अन्य एका गुंतवणूकदाराची ९ लाख रुपयांची फसवणूक झाल्याचे तपासात समोर आले आहे. ठराविक टप्प्यानंतर पैसे काढण्याचा प्रयत्न केला असता तांत्रिक अडचणींची कारणे देत संपर्क तोडण्यात आला. पोलिसांनी गुन्हा दाखल केला असून, पुढील तपास करत आहेत.

दरम्यान, सायबर पोलिसांनी नागरिकांना आवाहन केले आहे की, कोणत्याही अनोळखी व्हॉट्सॲप किंवा टेलिग्राम शेअर ट्रेडिंग ग्रुपवर विश्वास ठेवू नये. मोठ्या नफ्याचे आमिष दाखवणाऱ्या ऑनलाईन ऑफर्सपासून सावध राहावे आणि संशयास्पद प्रकार आढळल्यास तात्काळ सायबर पोलिसांशी संपर्क साधावा.