पालघरमध्ये पाच वर्षीय चिमुरडीचा विनयभंग.

  पालघर : पालघर पूर्व भागात माणुसकीला काळिमा फासणारी एक घटना समोर आली आहे. एका कार्यालयात सुरक्षारक्षक म्हणून काम करणाऱ्या एका व्यक्तीने पाच...

 

पालघर : पालघर पूर्व भागात माणुसकीला काळिमा फासणारी एक घटना समोर आली आहे. एका कार्यालयात सुरक्षारक्षक म्हणून काम करणाऱ्या एका व्यक्तीने पाच वर्षीय चिमुरडीवर विनयभंग केल्याची धक्कादायक घटना घडली आहे.

याप्रकरणी पालघर पोलिसांनी तत्परता दाखवत आरोपीला २० डिसेंबर रोजी अटक केली असून, न्यायालयाने त्याला दोन दिवसांची पोलीस कोठडी सुनावली आहे.

मिळालेल्या माहितीनुसार, ही घटना १९ डिसेंबरच्या रात्री पालघर पूर्व परिसरातील एका कार्यालयाच्या आवारात घडली. संबंधित आरोपी पीडित मुलीसोबत अश्लील चाळे करून तिचा विनयभंग केला. हा प्रकार उघडकीस येताच परिसरात एकच खळबळजनक उडाली. पालघर पोलिसांनी घटनेचे गांभीर्य ओळखून तातडीने गुन्हा दाखल केला आणि २० डिसेंबर रोजी सकाळी आरोपीच्या मुसक्या आवळल्या.

सुरक्षारक्षकांच्या पूर्व पडताळणीचा प्रश्न ऐरणीवर

पालघरचे पोलीस अधीक्षक यांनी यापूर्वीच स्पष्ट आदेश दिले होते की, जिल्ह्यातील सर्व आस्थापना, कारखाने आणि कार्यालयांमध्ये काम करणाऱ्या कर्मचाऱ्यांची, विशेषतः परराज्यातून आलेल्या कामगारांची आणि भाडेकरूंची कागदपत्रे पोलिसांकडे जमा करणे अनिवार्य आहे. मात्र, या घटनेनंतर संबंधित सुरक्षारक्षकाची ‘पोलीस पडताळणी’ केली होती का? असा गंभीर प्रश्न आता उपस्थित होत आहे. जर प्रशासकीय नियमांचे पालन झाले असते, तर अशा गुन्हेगारी प्रवृत्तीच्या व्यक्तीला कामावर ठेवले गेले असते का? असा संतप्त सवाल नागरिक विचारत आहेत.

नागरिकांमध्ये चिंतेचे वातावरण

पालघरसारख्या भागात लहान मुली असुरक्षित असल्याच्या घटनांमुळे नागरिकांमध्ये तीव्र संताप व्यक्त होत आहे. “परराज्यातून येणाऱ्या आणि सुरक्षारक्षक म्हणून काम करणाऱ्या व्यक्तींची सखोल चौकशी होणे गरजेचे आहे,” अशी मागणी स्थानिक रहिवाशांनी केली आहे.

पोलीस अधिक तपास करत आहेत

पालघर पोलिसांनी याप्रकरणी पोक्सो अंतर्गत गुन्हा दाखल केला असून, आरोपीला अधिक चौकशीसाठी दोन दिवसांची पोलीस कोठडी मिळाली आहे. या घटनेमागे अजून काही प्रकार आहेत का किंवा आरोपीचा पूर्वेतिहास काय आहे, याचा तपास पालघर पोलीस करत आहेत.