Kolhapur | महिला सभागृहात ६ नृत्यांगनांचा सामूहिक आत्महत्येचा प्रयत्न नेमकी घटना काय?

  कोल्हापूर जिल्ह्यातील करवीर तालुक्यातील कात्यायनी परिसरात घडलेली एक अत्यंत धक्कादायक घटना समोर आली आहे. संशयाच्या आधारे ताब्यात घेतलेल्या ...

 

कोल्हापूर जिल्ह्यातील करवीर तालुक्यातील कात्यायनी परिसरात घडलेली एक अत्यंत धक्कादायक घटना समोर आली आहे. संशयाच्या आधारे ताब्यात घेतलेल्या सहा नृत्यांगनांनी महिला सुधारगृहामध्ये राहत्या काळात हाताच्या नसा कापून आत्महत्येचा प्रयत्न केल्याने परिसरात खळबळ उडाली आहे.

ही घटना समजताच त्या सर्व महिलांना तातडीने कोल्हापूर येथील सीपीआर रुग्णालयात उपचारासाठी दाखल करण्यात आले असून सध्या त्यांच्यावर उपचार सुरू आहेत. गेल्या दोन महिन्यांपासून या महिला सुधारगृहात होत्या. त्यांच्यावर अश्लील नृत्य व देहविक्रीच्या संशयावरून पोलिसांनी कारवाई केली होती आणि न्यायालयाच्या आदेशानुसार त्यांना सुधारगृहात ठेवण्यात आलं होतं. त्या सातत्याने जामिनासाठी अर्ज करत होत्या, मात्र वारंवार नकार येत असल्याने त्या महिलांमध्ये नैराश्य निर्माण झालं. या मानसिक तणावातूनच त्यांनी हे टोकाचं पाऊल उचलल्याचं बोललं जात आहे.

या प्रकरणात अजून एक बाब समोर आली आहे. नंदगाव या करवीर तालुक्यातील गावामध्ये बारशाच्या कार्यक्रमात दोन नृत्यांगनांना नाचवण्यात आलं होतं. कार्यक्रमादरम्यान साऊंड सिस्टीमवर गाण्यांच्या तालावर काही तरुण व दोन तरुणी सार्वजनिक ठिकाणी अश्लील नृत्य करत होते. या घटनेचा व्हिडीओ सोशल मीडियावर व्हायरल झाला आणि ग्रामस्थांमध्ये संताप उसळला. गावातील तरुणांनी एकत्र येत कार्यक्रमस्थळी मोर्चा वळवला आणि पोलिसांना कळवले. यानंतर इस्पुर्ली पोलिस ठाण्याचे सहाय्यक पोलीस निरीक्षक मुद्दसर शेख यांनी घटनास्थळी धाव घेऊन दोन नृत्यांगनांसह सहा तरुणांना ताब्यात घेतलं. हे सगळं घडलं त्या गावात गेल्या १० ते १५ वर्षांपासून स्थायिक झालेल्या दोन बाहेरील कुटुंबांच्या संदर्भात असून, त्यांच्या एकाच्या बाळाच्या बारशाच्या निमित्तानेच हा कार्यक्रम आयोजित केला गेला होता.

या साऱ्या घटना केवळ कायद्याचा मुद्दा नसून, समाजाच्या मानसिकतेवरही प्रश्नचिन्ह उपस्थित करतात. या महिलांवर कारवाई झाली, हे मान्य आहे, परंतु त्यांच्या पुनर्वसनाची जबाबदारी कोणाची? समाजाने त्यांना तुच्छतेने न पाहता समजून घेण्याचा प्रयत्न केला पाहिजे. वारंवार नकार मिळाल्यानं आणि सामाजिक तिरस्कारामुळे मानसिक ताणतणाव वाढून, आत्महत्येसारख्या टोकाच्या कृतीकडे हे महिलांचं वळण लागणं ही बाब केवळ गंभीर नाही, तर दुःखद आहे. कोणत्याही व्यक्तीला सुधारण्याची संधी नाकारून, थेट दोषी ठरवणं आणि त्यांना समाजबाह्य समजणं, ही मानसिकता आपल्या साऱ्यांसाठी चिंतेची बाब आहे. ही घटना आपल्याला इतकं नक्की सांगते की न्याय व्यवस्थेबरोबरच समाजव्यवस्थेनेही आपली भूमिका तपासून पाहण्याची गरज आहे.