Ladki Bahin Yojana : लाडकी बहीण योजनेची ई-केवायसी करताना सावध, अन्यथा तुमचं बँक खातं होईल रिकामं!

  लाडकी बहीण योजनेसाठी ई-केवायसी अनिवार्य केले आहे, परंतु अनेक बनावट वेबसाइट्स समोर आल्या आहेत. या फसव्या वेबसाइट्समुळे महिलांची बँक खाती रि...

 

लाडकी बहीण योजनेसाठी ई-केवायसी अनिवार्य केले आहे, परंतु अनेक बनावट वेबसाइट्स समोर आल्या आहेत. या फसव्या वेबसाइट्समुळे महिलांची बँक खाती रिकामी होण्याचा धोका असून, सरकारने केवळ अधिकृत पोर्टल वापरण्याचे आवाहन केले आहे.

Ladki Bahin Yojana e-KYC: महाराष्ट्र सरकारने मुख्यमंत्री माझी लाडकी बहीण योजनेच्या सर्व लाभार्थी महिलांसाठी ई-केवायसी (e-KYC) करणे अनिवार्य केले आहे. यासाठी महिलांना दोन महिन्यांचा कालावधी दिला गेला आहे. त्यामुळे मोठ्या प्रमाणावर महिला ऑनलाईन ई-केवायसी करत आहेत. पण, याच दरम्यान गुगलवर काही फसवे वेबसाईट्स दिसू लागले आहेत, जे वापरणाऱ्यांचे बँक खाते रिकामे करू शकतात.

महिला व बालकल्याण खात्याने जाहीर केले आहे की, योजनेतील सर्व लाभार्थींनी दरवर्षी जून महिन्यात ई-केवायसी करणे बंधनकारक आहे. कारण, तपासणीदरम्यान हे समोर आले की सुमारे 26.34 लाख अपात्र लाभार्थी (ज्यात पुरुषांचाही समावेश आहे) या योजनेचा गैरफायदा घेत होते. त्यामुळे आता डिजिटल सत्यापनामुळे फक्त पात्र महिलांनाच योजनेचे पैसे मिळणार असून, फसवणूक थांबणार आहे.

अधिकाऱ्यांनी स्पष्ट केले आहे की ई-केवायसी केवळ सरकारी पोर्टलवरच करता येईल. https://ladakibahin.maharashtra.gov.in/ekyc गुगलवर सर्च करून दिसणाऱ्या इतर कोणत्याही वेबसाईटवर प्रक्रिया करण्यापासून दूर राहा.

अलीकडेच hubcomut.in नावाचे एक फसवे वेबसाईट समोर आले होते, जे गुगलवर KYC माहिती शोधल्यास दिसते. जर कोणी महिला अशा साइटवर आपली माहिती टाकली, तर तिचे बँक खाते तसेच वैयक्तिक माहिती हॅक होऊ शकते. यामुळे खात्यातून पैसे गहाळ होण्याचा आणि सायबर फसवणुकीचा धोका मोठा आहे.

महिला व बालविकास मंत्री आदिती तटकरे यांनी सांगितले की, ई-केवायसी प्रक्रिया अतिशय सोपी, सुरक्षित आणि पारदर्शक आहे. तसेच महिलांनी वेळेत ई-केवायसी करून घ्यावे, असेही त्यांनी आवाहन केले. यामुळे केवळ या योजनेचा लाभ चालू राहील असे नाही, तर भविष्यातील शासकीय योजनांपर्यंत पोहोच सुलभ होईल.