थरार! मैत्रिण पाठलाग करतेय म्हणून वेगाने गाडी पळवली अन् गेला ५ जणांचा बळी.

चिपळूण : एका युवतीने धावत्या जीपमधून उडी मारल्यानंतर जीप चालणारा तिचा मित्र वेगाने गाडी चालवू लागला. यानंतर युवती एका चारचाकीमध्ये बसली आणि ...

चिपळूण : एका युवतीने धावत्या जीपमधून उडी मारल्यानंतर जीप चालणारा तिचा मित्र वेगाने गाडी चालवू लागला. यानंतर युवती एका चारचाकीमध्ये बसली आणि जीपचा पाठलाग करू लागली. मैत्रिण आपला पाठलाग करतेय म्हणून जीपचालक मित्राने आणखी वेगाने गाडी पळवली.

पुढे जाऊन त्याने एका रिक्षाला धडक दिली. त्याचवेळी मागून भरधाव वेगाने ट्रक आला. जीप आणि ट्रकच्यामध्ये रिक्षा चेपली गेली. या विचित्र अपघातात जीपचालक युवक, रिक्षाचालक आणि रिक्षातील प्रवासी दाम्पत्य अन् त्यांचा 4 वर्षांचा मुलगा अशा 5 जणांचा जागीच मृत्यू झाला आहे.

पिंपळी येथील पुलावर रात्री 10 च्या सुमारास ही घटना घडली आहे. यामध्ये जीपचालक आसिफ हाकीमुद्दीन सैफी (वय 28, डेहराडून, उत्तराखंड), रिक्षाचालक इब्राहिम इस्माइल लोणे (वय 62, रा. पिंपळी), रिक्षातील प्रवासी नियाज महंमद हुसेन सय्यद (वय 50) आणि शबाना नियाज सय्यद (वय 40) आणि हैदर नियाज सय्यद (वय 4, सर्व. रा. पर्वती, पुणे) या पाच जणांचा मृत्यू झाला आहे. नियाज आणि शबाना यांचा मुलगा पिंपळी येथे मदारशामुळे शिक्षण घेत आहे. त्याला भेटण्यासाठी सय्यद कुटुंबिय आले होते. त्याला भेटून पुण्याला परतत असताना त्यांचा अपघात झाला.

जीपचालक आसिफ हाकीमुद्दीन सैफी हा आपल्या मैत्रिणीसोबत गोव्याला फिरायला गेला होता. गोव्यावरून येत असताना दोघांच्यात वाद झाला. त्यामुळे मैत्रिणीने जीपमधून उतरण्याचा हट्ट केला. चिपळूणपर्यंत त्यांचा हा वाद सुरू होता. शेवटी हा वाद टोकाला गेला आणि त्या युवतीने धावत्या गाडीतून उडी मारली. तिचा मित्र गाडी न थांबवता कराडच्या दिशेने गाडी सुसाट नेऊ लागला. तेवढ्यात मागे उडी मारलेल्या मैत्रिणीने एका कारचालकाला थांबवून त्याच्या गाडीत बसली आणि पाठलाग सुरू केला. जीपचालक मित्राने गाडी वेगाने पळवली आणि पुढे पिंपळी पुलावर भयानक अपघात झाला. पोलिसांनी युवतीला ताब्यात घेतले असून, पुढील तपास करत आहेत.