जुन्नर तालुक्यातील गारपीट झालेल्या गावांना खासदार डॉ. अमोल कोल्हे यांची भेट.

  जुन्नर | काल रविवार दिनांक १३ एप्रिल २०२५ रोजी शिरूर लोकसभा मतदारसंघातील जुन्नर महसूल मंडलातील पारुंडे, येणेरे, काले, दातखिळवाडी, बुचकेवाड...

 

जुन्नर | काल रविवार दिनांक १३ एप्रिल २०२५ रोजी शिरूर लोकसभा मतदारसंघातील जुन्नर महसूल मंडलातील पारुंडे, येणेरे, काले, दातखिळवाडी, बुचकेवाडी, काटेडे, विठ्ठलवाडी, गोळेगाव, आलदरे, पिंपळगाव सिद्धनाथ, गोद्रे, कुमशेत, आगर, सोमंतवाडी, पाडळी, बागायत बुद्रुक व खुर्द, हापुसबाग, बादशाह तलाव आणि जुन्नर येथे अतिवृष्टी झाली. तर मढ महसूल मंडलातील पारगाव तर्फे मढ, सितेवाडी, वाटखळे, बगाडवाडी या गावांमध्ये मोठ्या प्रमाणावर गारपीट आणि अतिवृष्टी झाली. या गारपीट व अतिवृष्टीमुळे बाधित गावांतील रब्बी पिकांपैकी कांदा, फळबाग/आंबा व इतर भाजीपाला आदी पिकांचे मोठे नुकसान झाले. त्याचबरोबर गोद्रे आणि कुसूर गावांतील घरांची कौलं आणि पत्रे उडाल्याने घरांचेही नुकसान झाले आहे.

या वेळी शिरूर लोकसभा मतदार संघांचे खासदार डॉ अमोल कोल्हे यांनी या भागाला भेट देऊन या संकटाची दखल घेऊन मढ महसूल मंडळातील वाटखळे, पांगरी गावाची पाहणी केली. या पाहणी दरम्यान नुकसान झालेल्या शेतकऱ्यांशी डॉ अमोल कोल्हे यांनी चर्चा करुन त्यांच्या नुकसानीचा आढावा घेतला. अतिवृष्टी व गारपीट झालेल्या गावातील पीकांच्या आणि घरांच्या नुकसानीचे तत्काळ पंचनामे करावेत, तसेच तातडीने पंचनामे करून नुकसानग्रस्तांना भरपाई देण्यासाठी कार्यवाही सुरू करावी असे निर्देश तहसीलदार, महसूल विभाग व कृषी अधिकारी यांना दिले.