Pune Crime: स्वतः च्या मुलींसमोर नग्न होत अश्लील कृत्य; पित्यास नऊ महिन्यांचा कारावास

  पुणे : पोटच्या अल्पवयीन मुलींसमोर नग्न होऊन नृत्य, तसेच अश्लील वर्तन करत विनयभंग करणार्‍या ४१ वर्षीय पित्यास न्यायालयाने नऊ महिने सक्तमजुर...

 

पुणे : पोटच्या अल्पवयीन मुलींसमोर नग्न होऊन नृत्य, तसेच अश्लील वर्तन करत विनयभंग करणार्‍या ४१ वर्षीय पित्यास न्यायालयाने नऊ महिने सक्तमजुरी आणि वीस हजार रुपये दंडाची शिक्षा सुनावली.

पॉक्सोच्या विशेष न्यायाधीश सोनाली राठोड यांनी हा निकाल दिला. दंडाची रक्कम पीडितेला देण्यात यावी. तसेच दंडाची रक्कम न भरल्यास अतिरिक्त एक महिन्याचा साधा कारावास भोगावा लागेल, असेही आदेशात नमूद आहे.

ही घटना २३ जानेवारी २०१९ रोजी घडली. सहा महिने व नऊ वर्षीय मुलींच्या बाबत घडलेल्या घटनेप्रकरणी २६ वर्षीय महिलेने रांजणगाव एमआयडीसी पोलिसात फिर्याद दिली. आरोपी एका खासगी कंपनीत कामगार आहे. तर, फिर्यादी या गृहिणी आहेत. घटनेच्या दिवशी फिर्यादी या स्वयंपाकगृहात काम करत होत्या.

लहान मुलीच्या रडण्याचा आवाज आल्यानंतर त्यांनी खोलीकडे धाव घेतली. यावेळी, आरोपी चिमुकलीसमोर नग्न होऊन नृत्य करीत होता. यादरम्यान, नऊ वर्षीय मुलगी शिकवणीवरून घरी आली. त्यावेळीही आरोपीने तिच्यासमोर नग्न जात मुलीला स्वत:जवळ ओढून अश्लिल वर्तन करत विनयभंग केल्याचे फिर्यादित नमूद करण्यात आले होते.

रांजणगाव एमआयडीसी पोलिसांनी गुन्ह्याचा तपास करून न्यायालयात दोषारोपपत्र दाखल केले. या प्रकरणात, सरकार पक्षातर्फे सरकारी वकील अरूंधती ब्रम्हे यांनी काम पाहिले. त्यांनी चार साक्षीदार तपासले. त्यामध्ये, पीडिता, फिर्यादी, पंच व तपासी अधिकार्‍यांची साक्ष महत्त्वाची ठरली.