कोल्हापूरमध्ये प्रशांत कोरटकर याच्यावर कोर्टात वकिलाचा हल्ला.

कोल्हापूर : कोल्हापूर सत्र न्यायालयात मोठ्या पोलिस बंदोबस्तात सुनावणीसाठी आलेल्या प्रशांत कोरटकर हल्ला झाला आहे. न्यायालयीन परिसरातच वकिलाने...

कोल्हापूर : कोल्हापूर सत्र न्यायालयात मोठ्या पोलिस बंदोबस्तात सुनावणीसाठी आलेल्या प्रशांत कोरटकर हल्ला झाला आहे. न्यायालयीन परिसरातच वकिलानेच प्रशांत कोरटकरला पोलिस बंदोबस्तात असताना मारहाण केल्याची घटना घडली आहे.

या घटनेचा व्हिडिओ समोर आला असून, पोलिसांनी वेळीच वकिलांना आवरल्याने मोठा अनर्थ टळला. कोर्टामध्ये युक्तिवाद पूर्ण झाल्यानंतर वकील अमित कुमार भोसले यांनी प्रशांत कोरटकरवर हल्ला करण्याचा प्रयत्न केला. ये पश्या… म्हणत ते कोरटकरच्या दिशेने धावले असता पोलिसांनी तात्काळ त्यांना धरुन बाजूला केल्याचे व्हिडिओत दिसून येत आहे.

छत्रपती शिवाजी महाराज यांच्याबद्दल अपशब्द वापरणाऱ्या प्रशांत कोरटकर याला आज कोल्हापूरच्या सत्र न्यायलयात हजर करण्यात आले होते. यावेळी, दोन्ही बाजुंच्या वकिलांचा युक्तिवाद ऐकल्यानंतर आरोपी प्रशांत कोरटकरला न्यायालयाने दोन दिवसांची पोलिस कोठडी वाढवली आहे. यापूर्वी न्यायालयाने कोरटकरला तीन दिवसांची न्यायालयीन कोठडी सुनावली होती. त्यामुळे, आता 30 मार्चपर्यंत कोरटकरचा मुक्काम पोलिसांच्या कोठडीत असणार आहे. कोरटकरला पळून जाण्यासाठी कुणी-कुणी मदत केली, ऑनलाइन पेमेंट कोणी दिले, यासह आणखी तपास बाकी असल्याने पोलिस कोठडी वाढवून देण्याची मागणी सरकारी वकीलांच्या बाजूने करण्यात आली होती.

दरम्यान, कोल्हापूर न्यायालयाच्या मुख्य द्वारातून प्रशांत कोरटकरला न आणता माध्यमांना चकवा देऊन मागील दाराने पोलिसांनी त्याला न्यायालयात आणले. बुधवारच्या हल्ल्यानंतर पोलिस सतर्क झाले होते. त्यामुळे बाहेरील एकही माणूस न्यायालयात येणार नाही, याची काळजी पोलिसांनी घेतली. परंतु अमितकुमार भोसले हा वकिलच असल्याने तो आधीपासूनच न्यायालयात होता. तो हल्ला करेल अशी शंका कुणालाच आली नाही.

एरवी न्यायालयाच्या आवारात अमिकुमार भोसले नेहमी वावरत असतात. त्यामुळे पोलिसांनाही त्यांच्यावर शंका आली नाही. सुनावणी संपली आणि कोरटकरला घेऊन पोलिस कोठडीकडे निघाले, तसा अमितकुमारही सावध झाला. कोरटकर गाडीत बसण्याआधीच त्याच्यावर हल्ला करण्याचा प्रयत्न अमितकुमारने केला. घटनेचे गांभीर्य ओळखून पोलिसांनी तत्काळ हस्तक्षेप करून अमितकुमारला बाजूला केले.

दरम्यान, प्रशांत कोटरकर याच्यावर बुधवारीही देखील हल्ल्याचा प्रयत्न झाला. कोल्हापुरी पायताण घेऊन त्याला सोडणार नाही म्हणत एका व्यक्तीने त्याच्यावर हल्ल्याचा प्रयत्न केला. कोरटकरच्या वकिलांनी त्याच्या जीवाला धोका असल्याचे देखील न्यायालयाला सांगितले.