संकष्टी चतुर्थीनिमित्त श्री क्षेत्र लेण्याद्री येथे श्री गणेश महायाग संपन्न.

  प्रतिनिधी : प्रा. प्रविण ताजणे ( सर ) मंगळवार दि.२२ ऑगस्ट २०२४ रोजी संकष्टी चतुर्थीनिमित्त श्री क्षेत्र लेण्याद्री (ता. जुन्नर) येथील ‘श्र...

 

प्रतिनिधी : प्रा. प्रविण ताजणे ( सर )

मंगळवार दि.२२ ऑगस्ट २०२४ रोजी संकष्टी चतुर्थीनिमित्त श्री क्षेत्र लेण्याद्री (ता. जुन्नर) येथील ‘श्री गिरीजात्मज’ गणपतीचे हजारो भाविक भक्तांनी दर्शन घेतले. दिवसभर भाविकांची मोठ्या प्रमाणात गर्दी होती. श्री क्षेत्र लेण्याद्री परिसरास यात्रेचे स्वरूप प्राप्त झाले होते. यानिमित्ताने श्री गिरीजात्मजाच्या मूर्तीस व मंदिरात फुलांची आकर्षक सजावट करण्यात आली होती. संकष्टी चतुर्थी व श्रावण मासनिमित्त देवस्थानचेवतीने 'श्री गिरीजात्मज गणेश कृपा महायाग'चे आयोजन करण्यात आले होते. अशी माहिती देवस्थानचे अध्यक्ष संजय ढेकणे यांनी दिली.

श्री लेण्याद्री गणपती देवस्थानचे वतीने पहाटे ५.३० वाजता देवस्थानचे अध्यक्ष संजय ढेकणे, विश्वस्त जितेंद्र बिडवई यांच्या हस्ते श्रींचा अभिषेक व महापुजा करण्यात आली. त्यानंतर भाविकांनी दर्शनाचा लाभ घेतला. संकष्टी चतुर्थीनिमित्त श्री गिरीजात्मज गणेशाच्या मूर्तीस व मंदिर परिसरात फुलांची आकर्षक सजावट करण्यात आली होती. मंदिरात सकाळी ६ वाजता, दुपारी १२ वाजता व सायंकाळी ६ वाजता महाआरती करण्यात आली. दिवसभर विविध धार्मिकविधी करण्यात आले. तसेच भाविकांना देवस्थान ट्रस्ट मार्फत विविध सेवा पुरवण्यात आल्या. श्रावण महिन्यातील संकष्टी चतुर्थीमुळे भाविकांची व पर्यटकांची दिवसभर मोठ्या प्रमाणात गर्दी होती. भाविकांचे दर्शन सुलभ व्हावे याकरीता गर्दीचे नियोजन देवस्थानच्यावतीने केले होते. देवस्थानचेवतीने संकष्टी चतुर्थी व श्रावण महिन्यानिमित्त ‘श्री गिरीजात्मज गणेश कृपा महायाग’चे आयोजन करण्यात आले होते. यात ४५ यजमानानी सहभाग घेतला होता. त्यांस आवश्यक असलेले साहित्य व सुविधा देवस्थानचेवतीने पुरविण्यात आल्या होत्या. सकाळी ९ वाजता दिप प्रज्वलन व गणेश पुजनाने ‘श्री गणेश महायागचा’ प्रारंभ झाला. त्यानंतर विधीवत पुजा, होमहवन व महाआरती करण्यात आली. आलेल्या यजमानाचा देवस्थानचेवतीने श्रींची प्रतिमा देऊन सन्मान करण्यात आला. यावेळी देवस्थानचे अध्यक्ष संजय ढेकणे, उपाध्यक्ष गोविंद मेहेर, विश्वस्त प्रभाकर जाधव, मच्छिंद्र शेटे, जितेंद्र बिडवई, कार्यालयीन सचिव रोहीदास बिडवई, व्यवस्थापक निलेश सरजिने व देवस्थानचे कर्मचारी तसेच मोठ्या प्रमाणात भाविक भक्त व ग्रामस्थ उपस्थित होते. श्री गणेश महायागाकरीता पंचक्रोशीतील भाविक भक्तांनी तसेच देवस्थानचे कर्मचारी यांनी मोठे सहकार्य केले. सायंकाळी श्री मुक्ताई प्रासादिक भजनी मंडळ शिवेचीवाडी यांचे संगीत भजन झाले. रात्री चंद्रोदयाच्या वेळी श्रींची महाआरती करण्यात आली. त्यानंतर आलमे येथील निलेश महेंद्र नलावडे, ओतुर येथील धनंजय महादेव ढमाले व कांदळी वडगाव येथील दत्तात्रय गेणभाऊ घाडगे यांच्यावतीने महाप्रसादाचे आयोजन करण्यात आले होते. तसेच देवाचे नैवेदयाकरीता मंचर येथील बाळासाहेब बापू थोरात यांनी ५१ डझन केळी दिलीत. संकष्टी चतुर्थीनिमित्त दिवसभरात विविध क्षेत्रातील मान्यवरांनी श्रीं च्या दर्शनाचा लाभ घेतला. तसेच जुन्नर परिसरातुन व पुणे, अहमदनगर, मुंबई, ठाणे, नाशिक येथून मोठ्या प्रमाणात भाविक श्रींच्या दर्शनासाठी आले होते. अशी माहिती देवस्थानचे अध्यक्ष संजय ढेकणे यांनी दिली.