मुंबई: महाराष्ट्र नवनिर्माण सेनेचे नेते (मनसे) संदीप देशपांडे हे आज (शुक्रवार) पहाटे मॉर्निंग वॉकसाठी गेले असताना टोळक्याने त्यांना रॉड आण...
मुंबई: महाराष्ट्र नवनिर्माण सेनेचे नेते (मनसे) संदीप देशपांडे हे आज (शुक्रवार) पहाटे मॉर्निंग वॉकसाठी गेले असताना टोळक्याने त्यांना रॉड आणि स्टम्पच्या साहाय्याने मारहाण केली.
संदीप देशपांडे यांना किरकोळ दुखापत झाली आहे. त्यांना उपचारासाठी तातडीने हिंदुजा रुग्णालयात दाखल करण्यात आले आहे. याबाबतचा पुढील तपास पोलिस करत आहेत.
संदीप देशपांडे यांच्या हाताला आणि पायावर स्टम्पचा फटका बसल्याने दुखापत झाली आहे. मात्र, त्यांची प्रकृती स्थिर आहे. हल्लेखोर कोण होते, याची माहिती अद्याप मिळू शकलेली नाही. हल्लेखोरांच्या तोंडावर मास्क होते. त्यामुळे त्यांची ओळख पटू शकलेली नाही. या घटनेनंतर पोलिसांनी वेगाने तपासाला सुरुवात केली आहे.
संदीप देशपांडे आज नेहमीप्रमाणे मॉर्निंग वॉकसाठी शिवाजी पार्कमध्ये गेले होते. ते एकटेच होते. त्यावेळी शिवाजी पार्कच्या कट्ट्यावर चार ते पाच लोक बसले होते. त्यांच्या तोंडावर मास्क होते. या टोळक्याने संदीप देशपांडे यांच्यावर अचानक स्टम्प आणि लोखंडी रॉडच्या साहाय्याने हल्ला चढवला. टोळक्यातील एकाने संदीप देशपांडे यांच्या डोक्यात स्टम्प घालण्याचा प्रयत्न केला. मात्र, हा वार संदीप देशपांडे यांनी हातावर झेलला. या झटापटीत एक फटका त्यांच्या पायावर बसला. हा सगळा प्रकार पाहून आजुबाजूचे लोक संदीप देशपांडे यांच्या मदतीसाठी धावून आले. त्यानंतर हल्लेखोरांनी तिथून पळ काढला.
संदीप देशपांडे यांना उपचारासाठी हिंदुजा रुग्णालयात दाखल करण्यात आले आहे. नितीन सरदेसाई यांच्यासह मनसेचे स्थानिक नेते हिंदुजा रुग्णालयात देशपांडे यांना पाहण्यासाठी गेले आहेत. दरम्यान, या घटनेचे राजकीय पडसाद उमटण्याची शक्यता आहे. संदीप देशपांडे महानगरपालिकेतील घोटाळे बाहेर काढत असल्यामुळे त्यांच्यावर हा हल्ला झाल्याची शक्यता वर्तविली जात आहे.
.jpg)
COMMENTS