नांदेड: बिडी पिऊन झाल्यावर ती घरातील फवारणी करणाऱ्या टाकीवर पडल्यामुळे पेट्रोलचा भडका उडून घरातील तिघांचा मृत्यू झाल्याची धक्कादायक घटना ब...
नांदेड: बिडी पिऊन झाल्यावर ती घरातील फवारणी करणाऱ्या टाकीवर पडल्यामुळे पेट्रोलचा भडका उडून घरातील तिघांचा मृत्यू झाल्याची धक्कादायक घटना बल्लूर (ता. देगलूर) गावात घडली आहे.
या घटनेनंतर गावात हळहळ व्यक्त केली जात आहे. सूर्यकांत माधवराव सक्रप्पा (वय 52), गुबाई सूर्यकांत सक्रप्पा (वय 50) आणि मुलगा कपिल सूर्यकांत सक्रप्पा (वय 20) यांचा मृत्यू झाला आहे.
सूर्यकांत सक्रप्पा हे आपल्या पत्नी आणि मुलासह बल्लूर गावात वास्तव्यास होते. शेतीची कामे सुरु असल्याने पिकांवर फवारणी करण्यासाठी त्यांनी फवारणी टॅंक आणला आहे. त्यासाठी त्यात पेट्रोल सुद्धा भरून ठेवेले होते. सूर्यकांत यांना बिडी पिण्याची सवय असल्याने त्यांनी बिडी पेटवली. त्यांनतर बिडी संपणार असल्याने पेटती बिडी घराबाहेर फेकण्याचा प्रयत्न केला. मात्र, बिडी घरात असलेल्या फवारणी टॅंकमध्ये जाऊन पडली. टॅंकमध्ये पेट्रोल असल्याने जोराचा भडका झाला. पाहता-पाहता मोठा स्फोट झाला आणि सूर्यकांत यांच्यासह पत्नी गुबाई आणि मुलगा कपिल यांच्यावर आगीचा भडका जाऊन पडला. यामध्ये तिघेही गंभीर भाजले गेले. देगलूरच्या रुग्णालयात प्राथमिक उपचार केल्यानंतर पुढील उपचारासाठी त्यांना विष्णुपुरी नांदेड येथील सरकारी रुग्णालयात दाखल करण्यात आले. मात्र, उपचार सुरु असतांना अखेर तिघांचा मृत्यू झाला.
दरम्यान, या दुर्देवी घटनेत सूर्यकांत यांचे संपूर्ण कुटुंब संपल्यामुळे गावावर शोकाकाळ पसरली आहे. शेती करून कुटुंबाचा उदरनिर्वाह करणाऱ्या सक्रप्पा कुटुंबासोबत घडलेल्या या घटनेनंतर गावातील अनेकांच्या डोळ्यात अश्रू पाहायला मिळाले.
COMMENTS